Каля трох тыдняў на беларуска-польскай мяжы вымушана жывуць мігранты, якія сцвярджаюць, што прыехалі з Афганістану. Іх не пускаюць у Польшчу, але і ў Беларусь, адкуль яны прыбылі, яны таксама трапіць ня могуць. Польская памежная служба сцвярджае, што беларускі бок забяспечвае замежнікаў гарачым харчаваннем і вадой.
Мігранты жывуць на мяжы ўжо каля трох тыдняў. Па дадзеных памежнай службы Польшчы, іх каля 30 чалавек. У асноўным гэта грамадзяне Афганістана. Сярод іх некалькі жанчын і адна няпоўнагадовая дзяўчынка. З моманту нашага апошняга наведвання сітуацыя моцна змянілася. Нелегалы зараз жывуць у намётах, аднак доступ да іх абмежаваны. Паліцыя выставіла ачапленне на адлегласці 150 метраў. Валанцёры маюць зносіны з нелегаламі ў асноўным праз мегафон. Шум лесу, ветру, дажджу, ці працы тэхнікі побач замінаюць камунікацыі. Пачуць адно аднаго атрымліваецца не заўсёды.
«Цяпер кантакт быў ускладнены, мы іх ня чулі, паколькі там быў вельмі моцны шум ад рухавікоў, і ў лесе было шмат шуму. Мы толькі ведаем, што стан іх здароўя без зменаў. У кагосьці ёсць праблемы з выпусканнем мачы, ныркамі, паносам. Гэта самыя важныя праблемы», – распавядае перакладчыца Караліна Земба.
Валанцёры разбілі лагер ля мяжы паўтары тыдні таму. Збор інфармацыі аб сітуацыі – адзінае, чым яны могуць дапамагчы мігрантам.
«Час ад часу яны атрымліваюць ад беларускіх памежнікаў нейкае харчавання, два разы атрымалі хлеб і адзін раз цёплы абед. Гэта быў іх першы абед. Што тычыцца вады, тая інфармацыя якую атрымліваем ад афганцаў, яны не атрымліваюць чыстай вады, павінны піць з бруднага ручая», – адзначыла Каліна Чварнук з фундацыі «Ацалене».
Між тым польскую памежную службу беларускі бок запэўнівае, мігранты рэгулярна атрымліваюць харчаванне і пітво. У якасці пацверджання служба ў сваім твітары размясціла відэа, на якім бачна, што мігранты атрымліваюць харчаванне. Разам з тым дапускаць бежанцаў на сваю тэрыторыю польскі бок не мае намеру і прымаць заявы аб міжнароднай абароне не ў пунктах пропуску не будзе, заяўляюць у памежнай службе. Не пускаюць уцекачоў назад і беларускія памежнікі
«Замежнікі, якіх мы затрымалі ў гэтым годзе, знаходзяцца на беларускай баку легальна. Паколькі гэтыя асобы знаходзяцца легальна, яны павінны прыйсці на памежныя пераходы і падаць заяву аб міжнароднай абароне», – падкрэсліла прэс-сакратар памежнай службы Польшчы Анна Міхальская.
За апошнія содні польскія памежнікі перадухілілі незаконнае перасячэнне мяжы 74 мігрантаў. Усяго з пачатку жніўня ў Польшчу нелегальна не змаглі трапіць больш за 3 тысячы чалавек. 900 былі затрыманыя і змешчаныя ў лагеры для бежанцаў. Пакуль жа польскія памежнікі ўзводзяць на мяжы плот з калючага дроту.
Ігар Станкевіч, «Белсат»
