Мянчанку Юлію Якубовіч асудзілі на два гады «хатняй хіміі» за акцыю падтрымання палітвязняў, зладжаную на пераходзе, паведамляе праваабарончы цэнтр «Вясна».
Суд Цэнтральнага раёну 26 красавіка вынес прысуд у крымінальнай справе паводле ч. 1 арт. 342 Крымінальнага кодэксу супраць 33-гадовай Юліі Якубовіч.
Мянчанку абвінавацілі ў блакаванні праезджай часткі дарогі на Раманаўскай Слабадзе ў Менску 20 снежня і 3 студзеня за тое, што дзяўчына з групай людзей двойчы каля хвіліны пастаяла на пешаходным пераходзе са сцягамі.
«Менсктранс» шкоды не налічыў.
Пасля затрымання пры канцы студзеня Юлію дапытвалі некалькі дзён. Падчас следчых дзеянняў 2 лютага жанчына страціла прытомнасць ад знясілення і абязводжвання – яе шпіталізавалі і змясцілі пад кропельніцу. Потым маладую маці пасадзілі на два месяцы пад хатні арышт.
На судзе Юлія Якубовіч сваёй віны не прызнала.
Суддзя Вікторыя Шабуня пакарала яе 2 гадамі «хатняй хіміі» – столькі запрасіў пракурор Цімафей Нічыпарук. Меру стрымання Юліі змянілі з хатняга арышту на падпіску аб нявыездзе.
АД, belsat.eu