Арышты за каментары пра «Крокус Сіці Хол» і паўторныя суды. Рэпрэсіі 26 сакавіка
У Беларусі пачалася хваля затрыманняў за каментары пра тэракт у Расеі і «Крокус Сіці Хол». Разам з тым працягваюцца рэпрэсіі, якія сілавікі не перастаюць ладзіць з 2020 года. «Белсат» фіксуе парушэнні правоў людзей у Беларусі ў штодзённым аглядзе рэпрэсіяў.
26 сакавіка стала вядома прынамсі пра двух чалавек, якіх затрымалі за каментары пра «Крокус Сіці Хол». Адзін з іх – жыхар Шчучына. Яго вінавацяць у тым, што «здзекаваўся над трагедыяй, якая адбылася ў Расеі», а таксама ў «экстрэмісцкай дзейнасці».
Затрыманы кажа на відэа, якое сілавікі знялі пад прымусам, што пісаў каментары, бо не падтрымлівае вайну Расеі супраць Украіны.
Яшчэ адзін затрыманы – украінец, які з 1987 году жыве ў Менску.
«У міліцыі апынуўся з-за негатыўнага каментара з нагоды тэрарыстычнага акту, які адбыўся дзесьці там пад Масквой, узарвалі. Я напісаў, што я іх не шкадую», – кажа ён на відэа сілавікоў.
Сілавікі адсправаздачыліся, што затрымалі 20-гадовага жыхара Горадні Кірыла Гаўрылава. Яны пад выглядам знаёмага напісалі хлопцу з прапановай за грошы паздымаць вайсковую тэхніку. Калі Кірыл зрабіў здымкі і паспрабаваў забраць грошы ў тайніку, яго затрымалі.
Тым часам пачаўся чарговы суд над палітвязнем Дзмітрыем Рэзановічам. Яго вінавацяць у злосным непадпарадкаванні патрабаванням адміністрацыі калоніі. Справу будзе разглядаць суддзя Сяргей Кухацкавалец.
Раней паведамлялася, што Дзмітрыя неаднаразова змяшчалі ў ШІЗА, а таксама пазбавілі спатканняў і перадач, пагражалі перавесці на турэмны рэжым.
Дзмітрыя затрымалі напрыканцы кастрычніка 2020 года. 22 снежня 2021 года Менскі абласны суд пакараў Рэзановічу – 19 гадамі калоніі.
А ў Менскім гарадскім судзе з 19 сакавіка працягваецца суд над 57-гадовым Аляксандрам Верасовічам. За данаты яго абвінавачваюць паводле двух артыкулаў Крымінальнага кодэксу: фінансаванне дзейнасці экстрэмісцкага фармавання і фінансаванне ўдзелу на тэрыторыі замежнай дзяржавы ў ваенных дзеяннях. Справу разглядае Уладзімір Арэшка.
Верасовічу пагражае ад пяці да дзесяці гадоў калоніі. У мужчыны двое дзяцей.
У Гомлі затрымалі дырэктара тэлерадыёкампаніі «ФілТВ» Віталія Філінскага.
«Вядомага гомельскага бізнесоўцу прыцягнулі да адміністрацыйнай адказнасці за распаўсюд «экстрэмісцкіх» матэрыялаў. Яго справу 22 сакавіка ў судзе Цэнтральнага раёну Гомля разглядала суддзя Восіпава Алеся. Што прызначыў суд – невядома», – паведамляюць праваабаронцы «Вясны».
Віталь Філінскі ў 1996 годзе стварыў тэлерадыёкампанію «ФілТВ», асноўным напрамкам дзейнасці якой з’яўляецца рэклама на тэлебачанні. Ён таксама зʼяўляецца сябрам грамадскага абʼяднання «Адзінства», якое садзейнічае развіццю прыватнага прадпрымальніцтва.
Арсен Рудэнка belsat.eu
